Zakir Fərəcov və Fəzail Hüseynovla bağlı Prezidentə müraciətbackend

Zakir Fərəcov və Fəzail Hüseynovla bağlı Prezidentə müraciət

  • whatsapp
  • messenger
  • telegram
  • vkontakte
  • odnoklassniki

ŞƏHƏRİN  SAHİBİ  MƏNƏM,  MÜQAVİLƏ-ZAD  NƏDİR ? 

 

“YAĞMUR-2” MMC  718 min manat pulunu başçıdan və müavindən tələb edir

Sumqayıt şəhər İcra Hakimiyyətinin  başçısı Zakir Fərəcov və onun müavini  Fəzail Hüseynovla bağlı dövlət orqanlarına ünvanlanan şikayətlər, mediada dərc olunan tənqidi yazılar artmaqda davam edir. Həm də şikayət edənlər, bir-iki şirkət, yaxud 5-10 nəfər deyil. Xeyli sayda şirkət, iş adamları, yüzlərlə işçi  Zakir  Fərəcov və onun müavinindən Sumqayıt şəhərinin abadlaşdırılması  və quruculuğu  prosesində sərf etdikləri vəsaitlərini, əmək haqlarını, avadanlıqlarının pulunu və s tələb etsələr də ortada konkret nəticə yoxdur. Yuxarı orqanlar problemin tezliklə həll olunacağını deyir, Zakir   Fərəcov və Fəzail Hüseynov müxtəlif vədlər verir, amma neçə ildir problem yerində sayır.

 

Başçı və müavindən öz haqqını tələb edən çoxsaylı şirkətlərdən biri də “YAĞMUR-2” MMC-dir.

Məlumat üçün qeyd edək ki, “Yağmur-2” MMC məşhur “Rain Bird” şirkətinin rəsmi distribyutorudur və ABŞ-da hazırlanan, müasir standartlara cavab verən yüksək keyfiyyətli avtomatik suvarma avadanlıqlarının təchiz olunması ilə məşğuldur.

Şirkət Bakıda həyata keçirilən abadlıq və quruculuq işlərində, möhtəşəm Olimpiya stadionunun inşasında, Bulvar, Yeni Bulvar, Ağ Şəhər ərazilərində görülən işlərdə, Gəncə, Qəbələ, Şəmkir rayonlarında Heydər Əliyev parklarının salınmasında və digər mühüm layihələrdə yaxından iştirak edib.  

Şirkətin rəhbəri  Namiq Hacıyev və işçiləri əsasən Qarabağ müharibəsinin iştirakçılarıdır. Şirkətin rəhbərliyinin və işçilərin dövlət başçısı, İlham Əliyev cənablarına ünvanlanmış müraciətini dərc edirik:

Cənab möhtərəm Prezident !

Siz hər çıxışınızda məmurlardan tələb edirsiniz ki, iş adamlarına, sahibkarlara münbit şərait yaradılsın. Həm də biz iş adamlarından tələb edirsiniz ki, işlərimizi qanuni əsasda quraq.

Cənab Prezident, biz də bunu istəyirik, istəyirik görülən işlər qanuni əsasda olsun.

Amma Sumqayıt şəhərində görəcəyimiz işlər üçün şəhərin  icra başçısı Zakir Fərəcova  işləri sənəd əsasında, müqavilə ilə görmək istəyimizi dəfələrlə təklif etmişik. Ancaq Zakir Fərəcov həmişə bu təklifdən boyun qaçırıb və mənə

“ŞƏHƏRİN   SAHİBİ  MƏNƏM,  MÜQAVİLƏ-ZAD  NƏDİR ? Biz qardaşıq, mənə inamırsan? Məndən ehtiyat edirsən? İşini gör, pulunu al. Səni pis vəziyyətdə qoymaram, narahat olma” – deyirdi.

Cənab Prezident!

Direktoru olduğum  “YAĞMUR-2 MMC  10 aprel 2016-cı il tarixindən 15 noyabr 2016-cı il tarixinədək Sumqayıt Şəhər İH-nin başçısının,onun müavinlərinin, Azərsu ASC-nin Sumqayıt şəhəri idarəsinin rəhbərlikləri altında Sumqayıt şəhəri Sülh küçəsində yolun sağ və sol hissələrində (19,5 ha),Sumqayıt şəhər Yeni Bulvarı (21 ha)və Musiqi məktəbi (0,5 ha)ərazilərində avtomatik suvarma sisteminin və su nasoslarının quraşdırılması üzrə işləri yerinə yetirib.Ərazilərdə eyni zamanda işlərin həyata keçrilməsi üçün qeyd olunan müddət ərzində 2(iki) yer qazan “trençer”,2(iki)ekskavator, 2(iki) sahə rəisi, 40(qırx)işçi və montajçı olmaqla 2(iki) birqada işləyib.

İH-nin başçısı Zakir Fərəcov tərəfindən verilən vədə görə görülən işlərin və istifadə olunan materialın ümumi dəyəri (1 098 000,00 AZN) Sumqayıt şəhəri Yeni Bulvarın təhvil verilməsindən sonra ödənilməli idi. Lakin qeyd olunan müddət ərzində şirkətimizə hissə-hissə olmaqla ümumilikdə yalnız (380 000,00 AZN) ödənilib və 28 avqust 2016-cı il tarixindən bu günə kimi şirkətimizə görülən işlərə və istifadə olunan materiala görə ödəniş olunmayıb.

Şirkətin və fəhlələrin bu günə qədər ödənilmədiyi
(718000,00 AZN) yerdə qalan pulu Zakir Fərəcovdadır.

 

Möhtərəm Prezident !

10 Aprel 2016-cı il tarixdə  Sumqayıt Şəhər icra hakimiyyətinin başçısı Zakir Fərəcovun, başçısının həmin ərəfədəki  1-ci müavni Faiq Kərimov və İH-nin başçısının digər müavini Hüseyinov Fəzail ilə şirkətimizin verdiyi təklif müzakirə olunub və qəbul edilmişdir. Bununla da, Sumqayıt şəhəri Sülh küçəsi,Yeni bulvar və Musiqi məktəbi ərazilərində avtomatik suvarma və nasos sistemlərinin quraşdırılması üçün razılıq əldə olunmuşdur.Tikinti və abadlıq işlərinin idarə olunması üçün Yeni Bulvar ərazisində “Dəniz”restoranında Qərərgah toplantı təşkil olunmuşdur.

Sumqayıt Şəhər İH-nin başçısı Zakir Fərəcov həmin toplantıda şəxsən özü işlərin başlanması üçün tapşırıq vermişdir. Başçı bizi inandırıdı ki, işi vaxtında görün pulunuzu alacaqsınız.

Cənab Prezident !

3 ildən artıqdır ki, pulumuzu Zakir Fərəcovdan ala bilmirik. Dəfələrlə Zakir Fərəcovun müavini Fəzail Hüseynov öz kabinetində bizi qəbul edib və “ Narahat olmayın KİŞİ-nin ( yəni Zakir Fərəcovun ) indi pulu yoxdur, 1 aydan sonra olacaq və pulunuzu tam verəcək” deyə-deyə bizi 3 ildir aldadıb, indi isə Fəzail Hüseynov bizi qəbul etmək istəmir.

Möhtərəm Prezident !

 Biz Sizə güvənirik, ümid edirik ki, halal pulumuzun  Zakir Fərəcov və Fəzail Hüseynovdan alınıb özümüzə qaytarılması üçün  qəti tapşırıq verəcəksiniz “.