Xaçmaz rayonunun Gödəkli kəndində qarajda asılaraq öldürülən sahibsiz it Daşdəmirovlar ailəsinin evindən konfet oğurlayıbmış.
TİA.AZ xəbər verir ki, bu barədə Xəzər TV-nin hazırladığı materialda 86 yaşlı Balasoltan Daşdəmirov baş verən hadisəyə aydınlıq gətirərkən məlumat verib.
Sosial şəbəkələrdə itə rəhmsiz davranışı ilə tənqid edilən B.Daşdəmirov deyib ki, iti öldürmək niyyəti olmayıb:
“İti qaraja gətirib ip ilə boynundan bağladım. Yuxarıdan asılan dəmirdən ipin digər ucunu bağladım ki, aparıb azdıraram. İt özünü çuxura atıb, ölüb”.
B.Daşdəmirovun həyat yoldaşı deyir ki, onlar yas yerinə gedib, qayıdanda isə itin evə daxil olub konfetləri küçəyə dağıtdığını görüblər:
“Qazanı açıb nə var, nə yox dağıdıb. Evə gələndə küçədən konfetləri yığırdım”.
Qeyd edək ki, sosial şəbəkələrdə yayılan görüntü istifadəçilərin narazılığına səbəb olub. İnsanlar itin amansızlıqla asılaraq öldürülməsini tənqid ediblər.
