Azərbaycan Qiymətləndiricilər Cəmiyyətinin (AQC) İdarə Heyətinin yeni sədri Vüqar Orucun “Report”a müsahibəsi:
– Vüqar müəllim, bir qədər Azərbaycanda qiymətləndirmə fəaliyyətinin tarixinə və bu sahədə AQC-nin gördüyü işlərə nəzər salaq.
– Azərbaycanda qiymətləndirmə sahəsinin fəallaşması 1998-ci ildən başlayıb. O dövrə qədər çox primitiv şəkildə qiymətləndirmə işləri aparılıb. Adətən kredit verən təşkilatların özləri kredit üçün qoyulan girovun qiymətləndirilməsini həyata keçirib. Bu da həmin dövr üçün ciddi problemlərə səbəb olurdu. Qiymətləndirmə işi müstəqil olmalıdır. Kredit verən tərəf qiymətləndirmə işini aparırsa, o daha çox öz istəyini nəzərə almağa və obyektivlikdən kənar addım atmağa çalışacaq. 1998-ci ildə Milli Məclisdə qiymətləndirmə haqqında qanun qəbul edildi. Bu qanun həmin dövr üçün olduqca aktual idi və qiymətləndirmə şirkətlərinin yaranması üçün stimula çevrildi.
Həmin dövrdən Azərbaycanda qiymətləndirmə fəaliyyəti göstərən şirkətlər formalaşmağa başladı. İlk dövrlərdə bu şirkətlərin sayı az idi. Vaxt keçdikcə bu biznesə müxtəlif şəxslərin, şirkətlərin gəlişi baş verdi. Hazırda Azəraycanda ciddi şəkildə fəaliyyət göstərən və arasıra qiymətləndirmə işləri aparıb o qədər də ciddi olmayan şirkətlərin ümumi sayı 100-dən çoxdur. Onların 50-ə yaxınını AQC öz ətrafında birləşdirib. Cəmiyyət ciddi şirkətləri bir araya gətirməklə qiymətləndirmə sahəsində önəmli addım atıb və illərdir ki, bu şirkətlərin əlaqələndirilməsi, sertifikatlaşma və ixtisaslaşma məsələlərini həll edir. Hazırda Rusiya, Ukrayna, Belarus və digər postsovet ölkələrin qiymətləndirmə şirkətləri ilə münasibət qurmuşuq. Azərbaycanın milli qiymətləndirmə standartları formalaşdırılıb və nəşr olunub. AQC Beynəlxalq Qiymətləndirmə Standartları Komitəsinin assosiativ üzvüdür və ölkədə yeganə qurumdur ki, qiymətləndirmə standartları komitəsini təmsil edir.
– Bəs ölkədə qiymətləndirmə sahəsində hansı çatışmazlıqlar mövcuddur?
– 2008-ci ilə qədər bu sahə lisenziyalaşdırılırdı. Hər şirkət icazə alandan sonra fəaliyyətə başlaya bilərdi. Sonra qiymətləndirmə fəaliyyətini lisenziyalaşması ləğv olundu və sertifikatlaşma imtahanlarını keçirərək bu sahədə ayrı-ayrı şəxslərin və şirkətlərin fəaliyyətini tənzimlədik. Bu, bir tərəfdən pozitiv məsələ idi. Bazar müstəqilləşdi, fəaliyyətin genişlənməsi baş verdi. Digər tərəfdən çox ciddi nöqsanların meydana çıxmasına səbəb oldu.
Hər hansı bir qurum tərəfindən qiymətləndirmə fəaliyyəti inzibati qaydada tənzimlənmədiyinə görə, ayrı-ayrı neqativ hadisələrin meydana gəlməsi ilə qarşılaşdıq. Birincisi, bu sahədə şirkətlərin sayı artdı və onların sırasında beynəlxalq qiymətləndirmə standartlarına əməl etməyən, ayrı-ayrı biznes maraqlarını təmsil edən, qiymətləndirmə sahəsini gözdən salan şirkətlər də var. Bunlara qarşı cəmiyyət olaraq hansısa tədbir görmək imkanlarımız yox idi. Cəmiyyət yalnız tövsiyə vermək yaxud hansısa müraciət ünvanlamaq hüququna malikdir. Düşünürdük ki, bunu aradan qaldırmaq üçün ölkədə qiymətləndirmə bazarını tənzimləyən qurum lazımdır. Bu istiqamətdə dəfələrlə Milli Məclisə müraciət ünvanlamışdıq.
Ümumilikdə qiymətləndirmə fəaliyyəti haqqında qanunun təkmilləşdirilməsi üçün müraciətlər etmişdik. Bu il Milli Məclisdə qanun layihəsinin ilk oxunuşu gözlənilir. Yəqin ki, obyektiv, işlək və qiymətləndirmə bazarını tənzimləmək imkanlarına malik yeni qanun qəbul olunacaq. Bu qanundan gözləntilərimiz böyükdür. Qeyri-peşəkarların bazardan uzaqlaşdırılması, bazarın tənzimlənməsi və qiymətləndirici nüfuzunun daha da yüksəldilməsini təmin etmək istiqamətində çox ciddi tədbirlərin görüləcəyinə ümid edirik.
Hesab edirik ki, Qiymətləndiricilər Palatası yaranarsa, bu istiqamətdə ciddi şəkildə obyektiv nəzarətin, əlaqələndirmənin və koordinasiyanın həyata keçirilməsini təmin etmək mümkün olacaq. Bu zaman peşəkar şirkətlər üçün yeni üfüqlər açılacaq ki, onlar bazarda olan özbaşnalıqdan bu günə qədər çəkdiyi zərərləri konpensasiya etsin. Hazırda təsadüfi və qeyri-peşəkar şirkətlər qiymətləndirmə sifarişini beynəlxalq standartlara uyğun fəaliyyət göstərən şirkətdən 3-5 qat aşağı qiymətə yerinə yetirir. Bu da keyfiyyətsiz məhsulun və müəyyən dövrdən sonra problemlərin ortaya çıxması ilə nəticələnir. Qiymətlərin aşağı salınması, bazarda ciddi şirkətlərin oyundan kənar vəziyyətə salınması kimi proseslər ötən il AQC-nin ölkənin əsas aparıcı qiymətləndirmə şirkətləri ilə birlikdə antidempinq bəyanatının imzalanması ilə nəticələndi. Bəyan etdik ki, bu sənədi imzalayan şirkətlər müəyyən olunmuş minimal qiymətlərdən və mövcud beynəlxalq qiymətləndirmə standartlarının tələb etdiyi keyfiyyətdən aşağı xidmət göstərmək fikrində deyil. Ayrı-ayrı qurum və bankları hansısa xidməti əldə etdikdə bu məsələləri nəzərə almağa çağırdıq. Ümid edirik ki, Palatanın yaranması işin peşəkara həvalə edilməsi, bazarda stabillyin bərpası və özbaşnalığın aradan qaldırılması istiqamətində ciddi addımlarla nəticələnəcək.
– Palata və Cəmiyyətin eyni sahədə fəaliyyət göstərməsi necə mümkün olacaq?
– AQC Azərbaycanda fəaliyyət göstərən qiymətləndiricilərin beynəlxalq standartlarda baş verən yeniliklərlə bağlı məlumatlandırılması ilə məşğuldur. Cəmiyyət fəaliyyət istiqamətləri barədə tövsiyyələr verir, şirkətləri birlikdə birləşməyə çağırır, dempinqə qarşı mübarizə aparır. Amma Cəmiyyətin əlində inzibati resurslar yoxdur. Palatanın isə lisenziya vermək səlahiyyəti olacaq və icazə verilməyən təşkilatlarla heç bir qurum çalışa bilməyəcək. Cəmiyyətin isə belə hüququ yoxdur. Qiymətləndiricilər Palatası yaradıldıqdan sonra lisenziya məsələsi, xəbərdarlıqların edilməsi, lazım olduqda bəzi şirkətlərin müəyyən müddətə fəaliyyətdən kənarlaşdırılması kimi məsələlər tətbiq ediləcək ki, bu da qiymətləndiriclərdə əlavə məsuliyyətin olmasına səbəb olacaq. Hesab edirəm ki, belə bir addımın atılması AQC-nin də mənafelərinə uyğundur.
Çox adam fikirləşir ki, palata yaransa, cəmiyyətə ehtiyac qalmır. Amma belə deyil. Məsələn, Azərbaycanda Dövlət Turizm Agentliyi və Azərbaycan Turizm Assosiasiyası var. Assosiasiya ictimai fəaliyyətlə məşğuldur. Amma agentlik bu istiqamətin inzibati qaydada idarəedilməsi və tənzimlənməsi ilə məşğuldur. Palata yarandıqdan sonra inzibati istiqamətdə, AQC isə bu peşənin daha da inkişafı, yeniliklərin, standartların tətbiqi, qiymətləndiricilərin əlaqələndirilməsi istiqamətində fəaliyyət göstərəcək. Bu iki qurumun işi bir-birinə zidd deyil, yardımçı olacaq.
Qanun layihəsində əvvəlki qanunda əks olunan bir çox müddəalar, kimlərin qiymətləndirici ola bilməsi, qiymətləndiricinin hansısa təhsilə malik olması, qiymətləndirmə fəaliyyətinin hansı istiqamətlər üzrə tətbiq oluna bilməsi, eyni zamanda Palatanın hansı əsaslar üzərində yaranması, strukturu və digər məsələlər əksini tapır.
– Yeni sədr kimi planlarınız və Cəmiyyətin qarşıdakı hədəfləri nələrdir?
– Planlardan biri cəmiyyətin özünü maliyyələşdirməsi istiqamətində addımların atılmasıdır. Hazırda əvvəlki sədrlə təhvil-təslim işləri gedir. Yeni idarə heyəti həftə sonu ilk toplantısını keçirəcək. Ayrı-ayrı istiqamətlər üzrə departamentlərin formalaşdırılması, yeni sədr müavinlərinin təqdimatı gözlənilir. Cəmiyyətdə hazırda olan kadr bazasından istifadə edib departamentlərin formalaşması istiqamətində addımlar atılmasını planlaşdırıram. Əvvəllər Cəmiyyətin idarəetmə strukturu sədr və ayrı-ayrı istiqamətlərə cavabdeh olan şəxslərdən ibarət idi. Bu, bir qədər sadə üsul idi. Bunun mürəkkəbləşdirlməsi və daha nəticəli olması istiqamətində addımların atılması planlaşdırılır. Təqribən yeddi departament yaradılacaq. Layiqli şəxslər bu deparetmentlərə rəhbər təyin olunacaq.
Qeyri-Hökumət Təşkilatlarına Dövlət Dəstəyi Şurası və ayrı-ayrı dövlət qurumları ilə ilkin görüşlər planlaşdırırıq. Onlarla əməkdaşlıq istiqamətində addımlar atılacaq. Beynəxalq əlaqələrimizin daha da gücləndirilməsi istiqamətində addımlar atacağıq.
Hazırda Beynəlxalq Qiymətləndirmə Standartları Komitəsinin elmi və assosiativ üzvüyük. Komitənin tam hüquqliu üzvü kimi fəaliyyətimizi davam etdirmək üçün addımlar atacağıq. Türkiyə ilə qiymətləndirmə fəaliyyəti istiqamətində ikitərəfli addımların atılmasını və əməkdaşlığın başlanılmasını da planlaşdırırıq. Qarşıda mənim Türkiyəyə səfərim planlaşdırılır. Rusiya, Ukrayna və Belarusla münasibətlərimizin yenidən inkişafı və bərpası istiqamətində addımlarımız gözlənilir. Ən böyük problemlərdən biri olan ofis məsələmiz həll olunmalıdır. Bunun üçün ayrı-ayrı dövlət qurumları ilə danışıqlar aparacağıq.
Eyni zamanda Cəmiyyətə üzv olan şirkətlərlə görüşlərə start verəcəyik. Onların vəziyyəti, fəaliyyəti, gələcək planları barədə söhbətlərimiz olacaq. Həmin şirkətlərin mövcud gücünə uyğun onlarla iş birliyi quracağıq. Hansı şirkətin nə qədər üzvlük haqqı ödəmək imkanı olduğunu müəyyənləşdirəcəyik. Elə şirkətlər var ki, büdcəsi böyükdür, elələri var ki, az büdcəyə malikdir. Onların hamısına eyni miqdarda üzvlük haqqı tətbiq etmək düzgün deyil. Yəqin ki, yeni üzvlük haqqı məbləğlərinin müəyyən edilməsi istiqamətində addımlar atılacaq. Cəmiyyətin bununla bağlı müəyyən düstur müəyyən etmək imkanları var. Bu görüşlər həm də təftiş xarakterli olacaq. Bazarda daha ciddi şirkətlərin cəmiyyətdə olmasının tərəfindəyəm. Hazırda yeni şirkətlərin gəlməsi ilə bağlı 10-a yaxın müraciət də var. Onların da qəbulu prosedurlarına start verəcəyik. Qanun qəbul ediləndən sonra üzərimizə Palatanın formalaşdırılması istiqamətində çox böyük məsuliyyət düşür.
– Şirkətlərin AQC-ə üzv olması onlar üçün hansı üstünlükləri yaradır?
– Bir çox şirkətlərdə bu fikir var ki, cəmiyyət ancaq müəyyən dövrdə üzvlük haqqı almaq və şirkətlərin gücündən istifadə etmək üçündür. Əslində isə belə deyil. Biz yeni fəaliyyət dövründə sübut edəcəyik ki, Cəmiyyət də bazarda şirkətlər qədər gərəklidir. Şirkətlərin hüquqlarının müdafiəsi, onların fəaliyyətinin genişləndirilməsi üçün yeni qapıların açılması, onların Beynəlxalq Qiymətləndirmə Standartları Komitəsində təmsili Cəmiyyət tərəfindən olur. Cəmiyyət ölkədə yeganə strukturdur ki, beynəlxalq qiymətləndirmə standartlarından çıxış etmək hüququ var. Tutaq ki, hansısa şirkət cəmiyyətin üzvü deyil, amma öz hesabatlarında beynəlxalq qiymətləndirmə standartlarına əsasən qiymətləndirmə işi apardığını qeyd edir. Ciddi bir müzakirə getsə və Beynəlxalq Qiymətləndirmə Standartları Komitəsi həmin şirkətləri məhkəməyə versə, komitənin bu məhkəmələri udmaq şansı var. Çünki komitə bu şirkətlərə onun standartlarından istifadə hüququ verməyib. Yalnız cəmiyyət və ona üzv şirkətlər bu standartlardan hüququ qaydada istifadə səlahiyyətinə malikdir.
– Azərbaycanda bu vaxta qədər bir çox sahələrdə Türkiyə təcrübəsi tətbiq edilib və uğurlu nəticələr əldə olunub. Qiymətləndirmə sahəsində Türkiyə modelinin tətbiqi nəzərdə tutulubmu?
– Bu gün Azərbaycan daha çox beynəlxalq təcrübəyə üz tutub. Vaxtilə postsovet məkanında daha çox qərbin təcrübəsi öyrənilirdi. Biz də bu ölkələrlə əməkdaşlıq edərək həmin təcrübəni Azərbaycan gətirirdik. İndi birbaşa özümüz Beynəlxalq Qiymətləndirmə Standartları Komitəsi ilə əlaqəyə malikik. Bu baxımdan hansısa yenilik bizim vasitəmizlə birbaşa reallaşdırılır. Amma biz Türkiyənin təcrübəsini də öyrənməliyik. Türkiyə qiymətləndiricilər cəmiyyətinin rəhbəri ilə görüşümüz də təcrübə mübadiləsi etmək məqsədi daşıyır. Azərbaycan üçün hansı təcrübənin tətbiqi daha uyğundursa, onun tətbiqi istiqamətində addımlar atacağıq.
Qeyd edim ki, Azərbaycanda illərdir qiymətləndirmə prosesi aparılır. Bu istiqamətdə bizim mühüm uğurlara malik mütəxəssislərimiz var. Artıq qiymətləndirmənin Azərbaycanın təcrübəsindən də danışmaq olar. Bizdə yetərincə ciddi kadrlar var ki, daxili bazarda ciddi şəkildə fəaliyyət göstərir. Qarşımızdakı əsas məsələlərdən biri həmin kadrların və yeni hazırlayacağımız kadrların beynəlxalq arenaya çıxması və bu işi tək Azərbaycanda deyil, xarici ölkələrdə də təcrübədən keçirməsi istiqamətində yaxın gələcəkdə ilkin addımlar atmaqdır.
– Bilirik ki, qiymətləndirmə zamanı xərc yanaşması, müqayisə yanaşması və gəlir yanaşmasından istifadə edilir. Bu yanaşmaların tətbiqi ilə bağlı hər hansı dəyişiklik edilməsinə ehtiyac varmı?
– Sovet dövründə qiymətləndirmə bazasını xərc yanaşması təşkil edirdi. Bazar iqtisadiyyatı dövrünə qədəm qoyduqdan sonra müqayisəli yanaşma daha çox önəm kəsb etməyə başladı. İndi də müqayisə yanaşması qiymətləndiricilərin ən real hesab etdiyi yanaşmalardan biridir. Amma dövr keçdikcə bir çox ölkələrdə daha çox gəlir yanaşması önə çıxır. Bir sıra şirkətlər çalışır ki, obyektlərin qiymətləndirilməsində əsas ağırlıq gəlir yanaşmasına olsun. Hazırda ən çox istifadə edilən birinci gəlir, sonra müqayisə, sonra isə xərc yanaşmasıdır. Məsələn, Azərbaycanın ən ucqar kəndlərinin birində üç mərtəbəli liftə malik bir fərdi yaşayış evi tikilib. Həmin fərdi yaşayış evinin inşasına milyonlarla pul xərclənib. Amma bu o demək deyil ki, həmin evin bu günkü bazar dəyəri bir neçə milyon manatdır. Xərclər obyektlərin dəyərlərini nadir halda ifadə edir. Bu da o halda olur ki, həmin obyektin bazarı olmur, alqı-satqısı bir əldən digərinə keçməklə baş verir.
Hazırda yaşayış sahələri üçün gəlir yanaşmasını tətbiq etmirik. Amma istənilən kirayə verilən mənzilin kirayə qiymətərinə uyğun olaraq kapitallaşma metodu ilə bazar dəyərini müəyyən etsək, görərik ki, bi qiymət mənzilin satış qiymətindən fərqlənmir. Fərdi yaşayış evi mövsümi olaraq kirayəyə verilə bilirsə, onun da dəyəri belə hesablana bilər. Sırf yaşayış üçün olan və heç bir gəlir gətirmək imkanı olmayan evi gəlir yanaşması ilə qiymətləndirmək düzgün deyil.
Qiymətləndirmə standartlarında hansısa obyektin qiymətləndirilməsi üçün hər üç yanaşmanın tətbiqi arzuolunan hesab edilir. Amma hansından imtina edilirsə, bunun səbəbləri əsaslı olmalı və izah edilməlidir. Bu məsələ qiymətləndiricinin öz istəyinə buraxılır. Lakin bu o demək deyil ki, qiymətləndirici hansı yanaşmanı istəsə seçə bilər.
– Bakıda yeni mənzillərin qiymətləndirilməsi zamanı hansı amillər göz önündə tutulur?
– Sovet dövründə insanlar köhnə tikililərdə yuxarı mərtəbələrdən uzaq dururdular. Səbəb o idi ki, su təminatı yaxşı deyildi və lift problemi var idi. İndi isə əks proses gedir. Həm köhnə, həm də yeni binalarda yüksək mərtəbələrdən mənzil almaq daha çox dəbdədir. Yuxarı mərtəbələr dedikdə binanın mansard hissəsi nəzərdə tutulmur. Mansard arzuolunan deyil. Doqquz mərtəbəli binalarda səkkizinci mərtəbə daha əlverişlidir, nəinki birinci və ya ikinci mərtəbə. Yeni tikili bina 19 mərtəbəlidirsə, 18-ci mərtəbə digər mərtəbələrdən baha qiymətə təklif olunur. Bunun nümunələrini biz “Ağ Şəhər”də görürük. Bəzi MTK-larda hesablama qaydası var ki, hər mərtəbədə qiymət 5 % artır. Bu zaman qiymətləndirici də mənzilin orta bazar dəyərini müəyyən edəndə çətinlik çəkir.
Yaxşı olar ki, mənzil alanlar infrastrukturun inkişaf səviyyəsinə, ətrafda klinikaların, məktəblərin, bağçaların olması, nəqliyyat yollarının, metronun yaxında olması, birbaşa əsas yola çıxışın olmasına, binanın həyətinin genişliyinə diqqət etsinlər. Elə binalar var ki, həyətyanı sahəsi kifayət qədər deyil. Hər xırda detal nəzərə alınmalıdır. Binanın imici korlanmamış MTK -lar tərəfindən tikilməsi də önəmli amildir. Bəzən MTK bina tikilib qutarmadan hazır olmayan mərtəbədəki mənzilin alqı-satqısı üçün müqavilə bağlayır, bir müddət keçir və MTK öz verdiyi vədi yerinə yetirmir, proses uzanır və ya digər sıxıntılı hadisələr baş verir. Bunun üçün cəmiyyətdə öz nüfuzunu korlamayan MTK-lara müraciət olunmalıdır. Digər tərəfdən Bakıda məskunlaşma ildən-ilə artır və yaşayış sıxlığı yaranır. Yaşayış sıxlığı az olan yerlərə də diqqət yetirmək, infrastrukturun inkişaf perspektivlərini də nəzərə almaq lazımdır. İnfrastruktur inkişaf edən yerdə mənzil alan şəxs, oradakı nəqliyyat sıxlığına görə, elə problemlərlə üzləşə bilər ki, orada yaşamaq istəməz.
– Bakıda rayonlar üzrə orta təmirli mənzillərin qiyməti necə dəyişir?
– Yeni tikililər üzrə son dövrlər Xətai rayonunda qiymətlərin kəskin artımını müşahidə edirik. Xüsusən də bir otaqlı və bir otaqlıdan iki otaqlıya düzələn mənzillərdə bunu hiss edirik. Nərimanov rayonunda bir kvadrat metrin qiyməti 1 800-1 900 manatadırsa, Xətai rayonunda “Əhmədli”, “Həzi Aslanov” metrolarına yaxın hissələrdə eyni təklif qiymətini görə bilirk. Amma prestij, infrastruktur və mərkəzə yaxınlığa görə, Səbail və Nəsimi rayonları digərlərindən fərqlənir. Qiymətlər həmin yerlərdə daha yüksəkdir. Hətta Səbaildə, məsələn, “Port Baku”da mənzillərin bir kvadrat metrinin qiyməti 7 000-8 000 manatdır. Elə yerlər var ki, bir kvadrat metrin dəyəri 4 000-4 500 manat civarındadılr. Ola bilər ki, Nərimanov ərazisində eyni səviyyəli mənzili bir yerdə kvadratı 5 000 manata, başqa yerdə 2000 manata olsun. MTK belə hesab edir ki, onun universal və “A” tipli mənzilləri dünya standartlarına uyğundur və ona görə də baha qiymət qoyur. O baxımdan qiymətlərin formalaşmasında MTK-ların prestijinin, onların xidmət və işlətdikləri tikinti materiallarının keyfiyyətinin də rolu var.
– Bakıda mənzillərin kəskin bahalaşması gözlənilirmi?
– Son dövrlər, xüsusilə apreldən sonra qiymətlərdə stabillik yaranıb. Bu, həm də İpoteka və Kredit Zəmanət Fondunun növbəti kredit ayırması ərəfəsində olur. Mənzillərin qiymət artımı bir neçə məsələdən asılıdır.
Birincisi artımın gözlə görülən hissəsidir. Bir ölkənin valyutası dəyərdən düşürsə, orada mənzillərin qiyməti qalxır. Bu, gözlə görülən qalxmadır və əslində mahiyyətcə artım hesab olunmur.
İkincisi, dövlət iqtisadi inkişafa nail olursa, ora kənardan investisiya axını olur. Bu zaman mənzil alqı-satqısı artır və qiymətlər yüksəlir. İndiki halda qiymətlərdə xüsusi bir sıçrayışın olmasını gözləmək mümkün deyil. Çünki ilin əvvəlində bazar bir sıçrayış yaşayıb. Bundan sonra stabillik dövrünün olacağı gözlənilir. Sonra isə işğaldan azad edilmiş ərazilərə investisiya yatırımı belə sürətlə davam etsə, bu ərazilərdə infrastrukturun bərpası daha da sürətlənsə, əhalinin bir qisminin Bakıdan regionlara axını olacaq. Bu da bazarda müəyyən qədər tələbin azalması ilə nəticələnəcək. Eyni zamanda qaçqın və məcburi köçkünlərə verilmiş mənzillərin yenidən satışa çıxarılması və ya ehtiyacı olan şəxslərə verilməsi məsələsi gündəmdədir. Bu da baş versə, mənzilə olan tələbatın bir hissəsi ödəniləcək və qiymətlərdə stabillyiin saxlanılmasına səbəb olacaq. Qiymətlərin kəskin enəcəyini ehtimal etmirəm. Hazırda dünyadakı iqtisadi böhran və inflyasiya güclənirsə, manatın alıcılıq qabiliyyəti zəifləyirsə, qiymətin enməsindən söhbət gedə bilməz.
