Rus jurnalist Aleksey Pivovarov koronavirusa yoluxub. Pivovarov iki ay əvvəl koronavirusa qarşı “Satellite V” peyvəndi etdirib.
TİA.AZ xəbər verir ki, o, bu haqda öz Twitter mikrobloqunda məlumat verib.
“Onsuz da çoxları bilir deyə, bu haqda yazmağın doğru olduğunu düşünürəm: koronavirusa yoluxmuşam. Bəli, iki ay əvvəl kovidə qarşı peyvənd etdirdim. Beləcə, təcrübə yolu ilə bu vaksinin boş şey olduğunu öyrəndim. Ya da belə deyək: “Sputnik” məndə işə yaramadı”, – jurnalist yazıb.
Rus koronavirus peyvəndi: bəs bu barədə nələr məlumdur?
Avqust ayında Rusiyada COVID-19-a qarşı “dünyanın ilk” peyvəndinin qeydə alındığını elan edilib. İlk dəfə Putinin qızı üzərində sınaqdan keçirildiyi iddia edilir.
Moskva dünya elmi ictimaiyyətinə peyvəndin COVID-19-a qarşı təhlükəsiz və təsirli olduğunu təsdiqləyən sınaqlar barədə heç bir məlumat verməyib. Qeydiyyata alınmasından əvvəl peyvəndin klinik sınaqlarının üçüncü mərhələsi həyata keçirilməyib.
“Science” nəşri Rusiyanın yaxın zamanda öz peyvəndindən istifadə edə bilməyəcəyini qeyd edib. Nəşrə görə, Rusiya özü bunu yaxşı bilir. Bunu Rusiya Səhiyyə Nazirliyi tərəfindən verilən sertifikatın bəzi epizodlarında belə görmək olar. Ayrıca, nazirlik 1 yanvar 2021-ci ilə qədər peyvəndin geniş yayılmasını qadağan edir.
Eyni zamanda, beynəlxalq bir tədqiqat qrupu Rusiya peyvənd sınaqlarına dair hesabatdakı ehtimal olunan səhvlərdən narahatlığını ifadə edib. Bəzi qrafiklərdə şübhəli təkrarlamalar görünür, nəticələri doğrulamaq üçünsə kifayət qədər məlumat yoxdur.
