“Hindistan və Çin Rusiyanın ən son S-500 zenit-raket komplekslərinin ilk alıcıları ola bilər”
TİA.AZ xəbər verir ki, bunu Hərbi-Texniki Əməkdaşlıq üzrə Federal Xidmətin direktoru Dmitri Şuqayev RBC-yə müsahibəsində deyib.
“Bu sistem tələb olunan həcmdə Silahlı Qüvvələrə çatdırıldıqda, onu ixrac üçün də təmin etmək mümkün olacaq. Biz Hindistanı, o cümlədən Çini S-500 zenit-raket komplekslərinin gələcək sahibləri hesab edirik. Eyni zamanda, FSMTC potensial müraciətləri hər bir konkret halda ayrı-ayrılıqda nəzərdən keçirmək niyyətindədir”, – Dmitri Şuqayev bildirib.
Qeyd edək ki, S-500 Prometheus (ROC Triumfator-M) yeni nəsil yerdən havaya, yəni hava hücumundan müdafiə sistemlərinə aiddir. Bu, raket əleyhinə müdafiə potensialı artırılmış universal uzaqmənzilli və yüksək hündürlükdə kəsmə kompleksidir. S-500-ün məhv edilməsi radiusu təxminən 600 kilometrdir. O, hipersəs raket blokları da daxil olmaqla saniyədə yeddi kilometrə qədər sürətlə uçan on ballistik supersəs hədəfini aşkar edib eyni vaxtda vura bilir.
