Ermənistanda yeni qalımaqal yaşanır. Buna səbəb Qafan rayonu istiqamətində Azərbaycanla sərhəddə yeni bir ərazinin Ordumuzun nəzarəti altına keçməsidir. JAMAZ.İNFO xəbər verir ki, bu barədə ilk məlumatı Ermənistan parlamentinin üzvü, “Haystan” blokundan olan deputat Anna Qriqoryan yayıb.
O deyib ki, rəsmi İrəvan Qafan istiqamətində daha bir ərazini Azərbaycana “güzəştə” gedib. Belə ki, həmin rayonda yerləşən Pela dağı Azərbaycan Ordusunun nəzarətinə verilib. “Faktiki olaraq Pela dağı qonşu kəndlər üçün də birbaşa təhlükəsizlik təhdidləri yaradaraq tamamilə Azərbaycanın nəzarəti altına keçir”.
JAMAZ.İNFO xəbər verir ki, Ermənistan parlamentinin digər üzvü, “Şərəf Duyuram” fraksiyasının nümayəndəsi Tiqran Abramyan da həmin məlumatı təsdiqləyib. O deyib ki, Ermənistan hökuməti gizli şəkildə bir çox əraziləri Azərbaycana verməyə başlayıb. “Qafandakı Pela dağı Azərbaycana verilib. Uzun illər əvvəl həmin dağın bir tərəfi Ermənistanın, digər tərəfi isə Azərbaycanın olub. Lakin hazırda dağın hər iki üzü Azərbaycana verilib”.
Abramyan məsələni dəqiqləşdirmək üçün Qafan rəsmiləri ilə də danışıb. Ona deyiblər ki, bu məsələ barəsində danışmaq istəmirlər. “Amma bir qədər əvvəl Qafan rəsmiləri mənə bildirdilər ki, Pela dağı Azərbaycana verilib. Görünən odur ki, hökumət torpaqlarımızı səssizcə Azərbaycana verməkdədir”.
Qeyd edək ki, rəsmi Bakı bununla bağlı hər hansı məlumat yaymayıb. Azərbaycan Müdafiə Nazirliyi də məsələ barədə açıqlama verməyib.
