Tribuna İnformasiya Agentliyi

Messi üçün ölüm qalım oyunu – Matçları necə izləyək?

26 İyun

Dünya çempionatında qrup mərhələsinin son turunun oyunları davam edir. “Qafqazinfo” xəbər verir ki, bu gün daha 4 qarşılaşma baş tutacaq.

C qrupunda Avstraliya Peru ilə qarşılaşacaq. Yaşıl qitə təmsilçiləri bu görüşdə mütləq qələbə qazanmalıdır. Lakin onların taleyi heç də özlərindən asılı deyil. Danimarkanın Fransaya 2 top fərqi və ya daha  böyük hesabla uduzmağını gözləməlidirlər.

Fransa isə artıq növbəti mərhələyə adını yazıdırıb. Lakin onlar qrup lideri olmaq üçün mübarizə aparacaqlar. Danimarka ilə qarşılaşacaq “xoruzlar”a lider olmaq üçün heç-heçə də kifayət edəcək.

Digər iki oyun isə D qrupunda baş tutacaq. Dünya çempionatının ən qalmaqallı qrupunda təbii ki, bütün diqqətlə Argentina millisində olacaq.

Nigeriya ilə qarşılaşacaq Lionel Messi və komanda yoldaşları bu qarşılaşmada mütləq qalib gəlməlidir. Lakin bunu daha böyükhesabla etməlidirlər. Çünki top fərqində növbəti mərhələyə iddialı Nigeriya daha üstündür.

Qrupun digər oyununda isə lider Xorvatiya İslandiya ilə qarşılaşacaq. 1/8 finala adını yazdıran xorvatlar üçün matçın əhəmiyyəti bir o qədər də önəmli deyil. Lakin İslandiya bu görüşdə qələbə əldə etməklə adını növbəti mərhələyə yazdıra bilər.

Bu iki qrupda keçiriləcək oyunlarla 1/8 final mərhələsinin daha 2 cütünün adına aydınlıq gələcək.

DÇ-2018

3-cü tur

C qrupu

18:00. Avstraliya – Peru (İdman Azərbaycan, TRT Spor)

18:00. Danimarka – Fransa (AZTV, İctimai TV,  TRT1)

D qrupu

22:00. İslandiya – Xorvatiya (AZTV, TRT Sport)

22:00. Nigeriya – Argentina (İdman Azərbaycan, İctimai TV,  TRT1)