İki rus diplomatının ölkədən çıxarılması Almaniya ədliyyə sisteminin Berlində Gürcüstan vətəndaşı Zelimxan Xanqoşvilinin qətli ilə bağlı hökmə açıq cavab olub. Almaniya Xarici İşlər Nazirliyinin qərarı “pis hadisələrin baş verməsinin” nəticəsidir.
TİA.AZ xəbər verir ki, bu barədə Almaniyanın yeni seçilmiş kansleri Olaf Şolz Aİ sammitinə gələrkən bildirib. Berlin Ali Məhkəməsi dekabrın 8-də rusiyalı Vadim Sokolovu 2019-cu il avqustun 23-də Kleiner-Tiergarten parkında törətdiyi iddia edilən qətlə görə ömürlük həbs cəzasına məhkum edib. Üstəlik, məhkəmə Rusiya dövlət strukturlarının bu cinayətdə iştirakını elan edən prokurorların rəyi ilə razılaşıb.
Almaniyanın xarici işlər naziri Annalena Berbok bildirib ki, Berlin, qətli Almaniyanın “hüquq və suverenliyinin” pozulması sayır və buna görə iki rus diplomatı persona non qrata elan edir.
Rusiya Xarici İşlər Nazirliyi Sokolovun məhkəməsini son dərəcə qərəzli adlandırıb. Departament rusların günahsız olduğunu bəyan edib. Üstəlik, Rusiyaya görə, Almaniyadan çıxarılacaq Rusiya diplomatik missiyasının əməkdaşlarının da cinayətlə heç bir əlaqəsi yoxdur.
