“Çox istərdim ki, Azərbaycan hökuməti quru sərhədlərin bağlı olması ilə əlaqədar əsaslandırılmış məlumat yaysın”.
Bunu Bakupost.az -a quru sərhədlərin bağlı qalması ilə əlaqədar danışarkən millət vəkili Vahid Əhmədov deyib.
Deputat qeyd edib ki, sərhədlərin bağlı olmasını pandemiya və meymunçiçəyi ilə əlaqələndirmək absurddur:
“Bizim xaricdə oxuyan kifayət qədər tələbələrimiz, işləyən vətəndaşlarımız var ki, onlar Vətənə gələ bilmirlər. Eyni zamanda, turizmlə bağlı çox ciddi problem yaranıb. Burada problem böyükdür. Quru sərhədlərin bağlanmasının əsas səbəbi barədə rəsmi məlumat almamışıq. Əgər dövlətin hansısa bir sahəsi, yaxud təhlükəsizliklə əlaqədardırsa, müəyyən vaxt müddətinə bağlı ola bilər. Yox, əgər pandemiya və ya meymunçiçəyi ilə bağlıdırsa, bu, bir qədər sual doğuran və absurd məsələdir. Çünki bütün dövlətlər quru sərhədlərini açıb. Bir-iki dövlət var ki, sərhədləri bağlıdır, onlardan biri də Azərbaycandır. Mən quru sərhədlərin açılmasının tərəfdarıyam. Əgər quru sərhədlər açılmırsa, rəsmi orqanlar bunun əsas səbəbləri barədə əhalini məlumatlandırmalıdır.
Quru sərhədlərin bağlı olmasının turizmə vurduğu ziyanı çoxdur, amma əsas problem insanların vəziyyəti, Vətənə gələ bilməməsi ilə bağlıdır. Bu gün Rusiya, Gürcüstan, Türkiyə kimi ölkələrdə quru sərhədlərlə ticarət işləri aparan vətəndaşlarımızın problemi böyükdür. Çox istərdim ki, Azərbaycan hökuməti bununla əlaqədar rəsmi məlumat yaysın. Səbəbi əsaslandıraraq əhalini məlumatlandırsınlar”.
