Ərini öldürən vəzifəli qadın həbsdən azad olunmaq istəyir — ŞİKAYƏTbackend

Ərini öldürən vəzifəli qadın həbsdən azad olunmaq istəyir — ŞİKAYƏT

Bakıda ərini xüsusi amansızlıqla qətlə yetirməkdə təqsirləndirilən Rəna Sofiyevanın barəsində seçilmiş həbs qətimkan tədbirinin ləğv olunması ilə bağlı apelyasiya şikayəti verib.

Demokrat.az-ın əldə etdiyi məlumata görə, Rəna Sofiyeva bu qətl hadisəsində günahsız olduğunu qeyd edib. O, barəsində seçilmiş həbs qətimkan tədbirinin ləğv olunmasını, həbsdən azad olunmasını istəyib.Rəna Sofiyevanın şikayəti araşdırılması üçün Bakı Apelyasiya Məhkəməsinə təqdim olunub.

Şikayət araşdırılması üçün hakim Vaqif Mursaqulovun icraatına verilib.Şikayətə mayın 31-də baxılacaq.Qeyd edək ki, Suraxanı rayon Məhkəməsinin qərarı ilə Rəna Sofiyevanın barəsində seçilmiş həbs qətimkan tədbirinin müddəti 2 aya qədər artırılıb.İttihama görə, ötən il iyulun 7-də, gecə saat 03.00-da Suraxanı rayonu, Yeni Günəşli qəsəbəsində yaşayan Araz Sofiyev evində həyat yoldaşı Rəna Sofiyeva tərəfindən öldürülüb.

Cinayəti törədən Rəna Sofiyeva daha sonra özünə də xəsarət yetirib. Ona xəstəxanada tibbi yardım göstərilib.

Rəna Sofiyeva ilkin istintaqa verdiyi izahatında göstərib ki, hadisə baş verən günü iki naməlum şəxs onların evinə basqın edib. Həmin şəxslərə Araz Sofiyevin pul borcu olub. Onlar ev sahiblərinə bıçaqla xəsarət yetiriblər.

Nəticədə Araz Sofiyev aldığı xəsarətlərdən həyatını itirib. Qadının bildirdiyinə görə, naməlum şəxslər evdən 4800 ABŞ dolları aparıb və evdən çıxarkən ona da bıçaqla xəsarət yetiriblər.

Lakin istintaq mənzilə iki nəfərin basqın etdiyini deyən Rəna Sofiyanın sözlərinə şübhə ilə yanaşıb və hesab edib ki, o, nəyisə gizlədir.

Aparılan istintaq zamanı müəyyən edilib ki, kişiyə 17 bıçaq zərbəsi endirilib. Araz Sofiyevə divanda oturanda hücum edilib.Qətl zamanı evdə Sofiyevlərin 15 yaşlı oğlu və öldürülən şəxsin qayınanası da olub. Onlar iddia ediblər ki, yatmış olublar, buna görə də heç nə eşitməyib və görməyiblər.

İlkin dindirmə zamanı Rəna Sofiyeva bildirib ki, üzlərini maska altında gizlətmiş cinayətkarlar onun ərindən pul tələb edib və münaqişə bu zəmində baş verib.

Ancaq münaqişənin səs-küylə müşayiət olunması qaçılmaz olardı. Kişiyə vəhşicəsinə divan tutmuş cinayətkarların cinayətin əsas şahidi olan qadına toxunmamaları da qəribə görünüb. Onlar yalnız qadının əlini yüngülcə yaralayıblar.

Məlumata görə, Sofiyevlərin evinin yaxınlığında quraşdırılmış müşahidə kamerası həmin gecə ərazidə kişinin hərəkətini qeydə alıb. Lakin hələlik istintaq həmin kişinin kim olduğunu müəyyənləşdirə bilməyib.

İstintaq belə nəticəyə gəlib ki, Rəna Sofiyeva istintaqdan həqiqəti gizlədib.Bu səbəbdən aparılan istintaq hərəkətləri zamanı qadın törətdiyi cinayəti etiraf edib. O, bildirib ki, ərini qısqanclıq zəminində yatarkən öldürüb.İstintaq orqanı tərəfindən Rəna Sofiyeva həbs edilib.

İstintaq orqanı tərəfindən Rəna Sofiyevaya Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) və 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddəsi ilə ittiham elan edilib.Suraxanı rayon Prokurorluğunda istintaq davam edir.

Qeyd edək ki, Rəna Sofiyeva kənd təsərrüfatı texnikalarının tədarükü üzrə ixtisaslaşan 4S şirkətinin keçmiş rəhbər müavini olub.Qətlə yetirilən Araz Sofiyev müxtəlif vaxtlarda BP-Azərbaycan, Baltika-Bakı və Aqrovest İMP-də çalışıb.

  • whatsapp
  • messenger
  • telegram
  • vkontakte
  • odnoklassniki