Azərbaycan, Rusiya və Ermənistan rəhbərliyi arasında hərbi əməliyyatların dayandırılması ilə bağlı imzalanan razılaşmada əsir və girovların dəyişdirilməsi nəzərdə tutulur. Sənədin 8-ci bəndində qeyd olunub: “Hərbi əsirlər, girovlar və digər saxlanılan şəxslərin, habelə cəsədlərin mübadiləsi həyata keçirilir”.
Bu çərçivədə 2014-cü ilin iyun ayında Kəlbəcrədə əsir götürülmüş Dilqəm Əsgərov və Şahbaz Quliyevin də Azərbaycana təhvil veriləcəyi gözlənilir.
Xatırladaq ki, Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcər rayonunda öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər. Bu zaman Azərbaycan vətəndaşı Həsən Həsənov öldürülüb. İşğal altındakı Dağlıq Qarabağda Dilqəm Əsgərov və Şahbaz Quliyev üzərində qanunsuz “məhkəmə” qurublar. “Məhkəmə”nin qərarı ilə Dilqəm Əsgərov ömürlük, Şahbaz Quliyev isə 22 il müddətinə azadlıqdan məhrum edilmə cəzasına məhkum olunub.