“Mən öncə dövlətimizin başçısı İlham Əliyevə təşəkkürümü bildirirəm ki, onun sayəsində girovluqdan azad olundum. Əslində girovluqda olduğum zaman ümidim var idi. Mən deyirdim ki, vaxt gələcək Azərbaycan əsgəri bura gəlib çıxacaq və elə də oldu. Xalqımızı qələbə münasibətilə təbrik edirəm”.
TİA.AZ xəbər verir ki, bu fikirləri Beynəlxalq Münasibətlərin Təhlili Mərkəzində keçirilən mətbuat konfransında erməni girovluğunda saxlanılmış Dilqəm Əsgərov deyib.
D.Əsgərov vurğulayıb ki, Şuşada həbsxananın içərisi beton idi: “Orada acınacaqlı vəziyyət var idi. Dövlətimizin təzyiqi nəticəsində Qırmızı Xaç Komitəsi bizə yemək və digər şeylər alıb gətirirdi. Həbsxanada da mənə işgəncələr, xüsusilə bədənimə elektrik cərəyanı verirdilər. Məqsəd Azərbaycan hökumətinin əleyhinə danışdırmaq idi. Ancaq mən buna imkan vermədim”.