S.Qafarova bildirib ki, Milli Məclis qanunvericilik səlahiyyətlərini tam həyata keçirib, Azərbaycan Prezidentin uzaqörən və düşünülmüş siyasətini parlament səviyyəsində dəstəkləmək üçün zəruri tədbirlər görülüb.
“Milli Məclis bu müddət ərzində beynəlxalq münasibətlərini möhkəmləndirib, xarici ölkələrdəki həmkarları ilə onlayın görüşlər keçirib. Vətən müharbəsində əldə edilmiş Qələbə münasibətilə Milli Məclis ayrıca iclas keçirib, Azərbaycan Prezidentinə və xalqına müraciət edib. Milli Məclis 2020-ci ili, payız sessiyasını uğurla başa çatdırır”.
Spiker təklif edib ki, Milli Məclis adından Azərbaycan Prezidenti İlham Əliyevə və Birinci xanım Mehriban Əliyevaya təbrik məktubları göndərilsin. Deputatlar təklifi alqışlayıblar.
Qeyd edək ki, sessiyanın başa çatması ilə deputatlar tətilə çıxıblar.
Milli Məclisin Daxili Nizamnaməsinə əsasən, səlahiyyəti dövründə parlament ildə iki dəfə – iyul ayının 15-dən avqust ayının 30-dək və yanvar ayının 1-dən 15-dək tətilə buraxılır. Tətil dövründə Milli Məclisin deputatları məzuniyyətdə sayılır. Tətil dövründə Milli Məclisin növbədənkənar sessiyası çağırıldıqda Milli Məclisin tətili növbədənkənar sessiyanın keçirildiyi müddətə dayandırılır və deputatlar həmin müddətə məzuniyyətdən geri çağırılırlar.
