Tarixi abidə statusu almış tikililərin üzərində kafe-restoranın fəaliyyəti yolverilməzdir. Çünki bu, əsrlərdən dövrümüzə gəlib çıxmış, Azərbaycan tarixini tərənnüm edən abidəyə hər an fiziki və texniki baxımdan xələl gətirə bilər.
Bu sözləri Axar.az-a Türkdilli Ölkələrin Beynəlxalq Araşdırmaları Elmlər Akademiyasının fəxri doktoru, memar Cahid Həsənov Qız qalasının yanındakı tarixi hamamın üzərində restoran-kafenin fəaliyyət göstərməsi haqda danışarkən deyib.
“Tarixi memarlıq abidələrinin yerləşdiyi ərazilərə yaxın hansısa müasir tikililərin ucaldılması, ciddi şəkildə zədələnməsi və uçmasına səbəb olacaq fəaliyyətlərin aparılması memarlıq haqqında qayda-qanunlara ziddir. Həmçinin, hansısa abidənin vizual görüntüsünün örtülməsi belə onun tarixinə ciddi zərər vurur.
Bu, Azərbaycanın tarixi memarlıq məktəbinə, mədəni dəyərlərinə ciddi xələl gətirən məsələdir”, – o bildirib.
Qeyd edək ki, Qız qalasının yaxınlığındakı tarixi hamamın üzərində restoran-kafenin fəaliyyəti ilə bağlı sorğumuza “İçərişəhər” Dövlət Tarix-memarlıq Qoruğu İdarəsi cavab verməyib.
