Tribuna İnformasiya Agentliyi

“Allianz Global”: Bitkoinin dəyəri yoxdur, balon hər an partlaya bilər

14 Mart

“Bitkoin balonunun partlaması ehtimal deyil, zaman məsələsidir”. 

“Report” xəbər verir ki, bu xəbərdarlıqla Avropanın ən böyük sığorta şirkəti – “Global Allianz”ın investisiya departamenti çıxış edib.

“Blokçeyn texnologiyası investorlara böyük fayda gətirsə də, kriptovalyutaların heç bir dəyəri yoxdur”, – deyə 500 mlrd. avro (620 mlrd. ABŞ dolları) məbləğində vəsaiti idarə edən “Allianz Global”dan bildirilib.

Şirkətin qlobal iqtisadiyyat və strategiya şöbəsinin rəhbəri Ştefan Xofrixter (Stefan Hofrichter) isə qeyd edib ki, bitkoinin real qiyməti 0-dır: “O, səhm, istiqraz və kağız pullardan fərqli olaraq hec nə və hec kimlə təmin edilməyib, bu gün aktiv gəlir də gətirmir. Kimsə kriptovalyutaları qızılla müqayisə edir. Amma, qeyd etməliyəm ki, qızıl 2 500 ildir ki, yığım vasitəsi kimi mövcuddur. Buna görə düşünürəm ki, bitkoin-maniya yaxın vaxtlarda bitəcək və bu balon partlayacaq”.

Bu açıqlamalardan sonra bitkoinin qiyməti bir qədər azalaraq 8 700 dolara düşüb.

“Report”un analitik qrupu hesab edir ki, martın 19-20-də keçiriləcək G20 zirvəsi başa çatana qədər bitkoin satışları davam edəcək, lakin kriptovalyuta bazarı yox olmayacaq.