ABŞ Səudiyyə şahzadəsini qatil elan etdi – Dövlət katibi 76 məmurun “qara siyahıya” salındığını elan etdibackend

ABŞ Səudiyyə şahzadəsini qatil elan etdi – Dövlət katibi 76 məmurun “qara siyahıya” salındığını elan etdi

  • whatsapp
  • messenger
  • telegram
  • vkontakte
  • odnoklassniki

ABŞ-ın dövlət katibi Entoni Blinken fevralın 26-da 76 səudiyyəliyə səfər qadağanı qoyulduğunu bəyan edib. Bundan əvvəl Birləşmiş Ştatların dərc etdiyi hesabatda deyilirdi ki, 2018-ci ildə jurnalist Camal Kaşıqçının qətlinin arxasında Səudiyyə Ərəbistanının qüdrətli vəliəhd şahzadəsi Məhəmməd bin Salmanın durduğuna inanılır.

Fevralın 26-da Kaşıqçının ölümünə dair çoxdan gözlənən hesabatın açıqlanmasından dərhal sonra Blinken deyib ki, Bayden administrasiyası Kaşıqçı da daxil, xaricdəki dissidentlərin təhdid edilməsi ilə bağlılığı olan səudiyyəli fərdlərə viza məhdudiyyətləri tətbiq edir.

Blinken izah edib ki, “Kaşıqçı qadağanı” adlandırılan bu məhdudiyyətlər Dövlət Departamentinə dissident olduğuna inanılan jurnalistləri, fəalları və ya başqa şəxsləri qısnayan, güdən, təhdid edən və ya onlara xəsarət yetirənlərə viza qadağanı qoymaq səlahiyyəti verir. Blinken bildirib ki, heç kəs hər hansı xarici hökumətin adından Amerika torpağında dissdentlərə ziyan vura bilməz.

Bu qadağanlar elan edilməzdən bir qədər əvvəl ABŞ prezidenti Co Baydenin administrasiyası 2018-ci ildə Kaşıqçının öldürülməsi barədə hesabatın məxfiliyini qaldırıb.

Hesabatın redaktə edilmiş variantında jurnalistin öldürülməsi missiyası ilə bağlı İstanbula səfər edən 15 nəfərlik zərbə komandası üzvlərinin adları açıqlanır.

4 səhifəlik hesabatda iddia edilir ki, ABŞ kəşfiyyatı bu adamların qətldə iştirak etməsinə yüksək dərəcədə əminliklə inanır: “Bizim qiymətləndirməmizə görə Səudiyyə Ərəbistanının vəliəhd şahzadəsi Məhəmməd bin Salman səudiyyəli jurnalist Camal Kaşıqçının Türkiyənin İstanbul şəhərində saxlanması və ya öldürülməsi qərarını təsdiqləyib”.

Səudiyyə Ərəbistanı bildirmişdi ki, Kaşıqçı xəfiyyələrin “özbaşına əməliyyatında” öldürülüb və vəliəhd şahzadənin bundan xəbəri olmayıb.

ABŞ-da mühacir həyatı sürən 59 yaşlı Kaşıqçı “The Washington Post” qəzeti üçün Səudiyyə hökumətini tənqid edən məqalələr yazırdı.

O 2018-ci iln oktyabrında tovlanaraq Səudiyyənin İstanbuldakı konsulluğuna gətirilib və burada inanıldığına görə öldürülərək tikə-tikə doğranıb. Jurnalistin ölümü dünya boyunca hiddətə səbəb olmuşdu. Bayden administrasiyası bunu da bildirib ki, prezident Səudiyyə ilə bağlı məsələləri vəliəhd şahzadə ilə deyil, onun 85 yaşlı atası kral Salmanla müzakirə edəcək.

Fevralın 25 telefonla danışan Bayden və kral Salman iki ölkə arasında onilliklərdir davam edən müttəfiqliyə sadiq qalacaqlarını bildiriblər. (azadlıq.org)