access_time Dərc olunub: 21:19
Bərdə rayonunda “Vətənin müdafiəsinə hazıram!” adlı tədbir keçirildi

Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidməti fəaliyyət istiqamətinə uyğun olaraq, Azərbaycan Respublikası vətəndaşlarının hərbi-vətənpərvərlik tərbiyəsi, yeniyetmə və gənclərdə vətəndaşlıq hisslərinin yüksəldilməsi, onların Azərbaycanın müstəqilliyi və ərazi bütövlüyü uğrunda mübarizəyə hazırlıq ruhunda tərbiyə edilməsi məqsədi ilə mütəmadi olaraq ictimai tədbirlər həyata keçirir. 


Xidmətin 2017-ci il üçün fəaliyyət planına əsasən, 21 aprel 2017-ci il tarixdə Bərdə rayon İcra Hakimiyyəti ilə birgə “Vətənin müdafiəsinə hazıram!” mövzusunda tədbir keçirilmişdir. Tədbirdə Bərdə rayon İcra Hakimiyyəti başçısının müavini Fəqət Şadlinskaya, Səfərbərlik və Hərbi Xidmətə Çağırış üzrə Dövlət Xidməti rəisinin müavini general-mayor Novruzəli Orucov, orta məktəblərin yuxarı sinif şagirdləri, şəhid ailələrinin üzvləri, Qarabağ müharibəsi veteranları iştirak etmişlər. Tədbir Azərbaycan Respublikası Dövlət Himninin səsləndirilməsi ilə başlanılmış, daha sonra Azərbaycan Respublikasının ərazi bütövlüyü və suverenliyi uğrunda şəhid olmuş vətəndaşlarımızın xatirəsi bir dəqiqəlik sükutla yad edilmişdir. Tədbiri giriş sözü ilə açan Bərdə rayon İcra Hakimiyyəti başçısının müavini Fəqət Şadlinskaya gənclərin vətənpərvərlik ruhunda tərbiyə edilməsi istiqamətində həyata keçirilən işlərin əhəmiyyətindən danışmışdır. Səfərbərlik və Hərbi Xidmətə Çağırış üzrə Dövlət Xidməti rəisinin müavini general-mayor Novruzəli Orucov qeyd etmişdir ki, ölkə rəhbərliyinin diqqət və qayğısı nəticəsində ən müasir silah və hərbi texnika ilə təchiz edilmiş Azərbaycan ordusu ötən ilin aprel ayında düşmənin təxribatının qarşısını qətiyyətlə alaraq düşməndən dəfələrlə üstün olduğunu sübut etmişdir. Tədbirin bədii hissəsində vətənpərvərlik mahnılarının mahir ifaçısı Şəmistan Əlizamanlı və Bərdə rayon məktəblərinin özfəaliyyət kollektivləri vətənpərvərlik mövzusunda tərtib edilmiş proqramla çıxış etmişlər. 

Şərhlər